"অনুভৱৰ ৰঙীন পৃষ্ঠাত মহাৰথীৰ মহাপ্ৰাণ কৰ্ণ"

 এক বিশাল প্ৰতিভাসম্পন্ন মহাপ্ৰাণ চৰিত্ৰ কৰ্ণক এক নতুন ৰূপত পৰিচয় কৰাই দিয়া চন্দ্ৰ প্ৰসাদ শইকীয়া দেৱৰ মহান প্ৰচেষ্টাক হৃদয়ৰ পৰা ধন্যবাদ জ্ঞাপন কৰিছোঁ, এনে এখন সুখপাঠ্য উপন্যাস পঢ়ি মনটো স‌ঁচাকৈয়ে গভীৰ প্ৰশান্তিৰে ভৰি পৰিছে। কিদৰে জন্ম মুহূৰ্ততে পিতৃ মাতৃৰ পৰা নিদাৰুণভাৱে পৰিত্যক্ত হৈয়ো কি নিৰৱাচ্চিন্ন সাধনা , অসীম পৰাক্ৰম দেৱৰোদুৰ্লভ উদাৰতা ,যুদ্ধ-বিচক্ষণতাৰে তেওঁ মহাভাৰতৰ এক চিৰস্মৰণীয় পৰ্যায়লৈ নিজকে উত্তৰণ ঘটাইছিল তাৰ এক আলোক সন্ধানী বিশ্লেষণৰ প্ৰচেষ্টাতে এই উপন্যাসৰ সৃষ্টি হৈছে। 

 নিশ্চিত মৃত্যুৰ কথা জানিও কাহানিও বন্ধু দুৰ্যোধনৰ সংগ ত্যাগ নকৰি জন্মতে যমুনাৰ হীম শীতল পানীত বিৰ্সজন দিয়া  গৰ্ভধাত্ৰী  মাতৃ কুন্তীৰ শেষ অনুৰোধ তথা মাতৃৰ দুচকুত চকুলো চাব নোৱাৰি নিজ জীৱনকো তুচ্ছ জ্ঞান  কৰি শেষত পাঁচোটা ভাতৃক সেই মাতৃৰ ওচৰত জীৱন দান কৰি চিৰজীৱন ভাৰতৰ ইতিহাসত দানবীৰ হিচাপে স্বৰ্ণমণ্ডিত ইতিহাস ৰচনা কৰি জীৱন নাটৰ সামৰণি পেলোৱা মহাকাব্যিক যুগৰ প্ৰসিদ্ধ বীৰ ,দানবীৰ মহাৰথী কৰ্ণক বিশাল আৰু বৰ্ণাঢ্য ৰূপত পাঠকৰ সন্মুখত তুলি ধৰাত চন্দ্ৰ প্ৰসাদ শইকীয়াদেৱ সম্পূৰ্ণ ৰূপে সফল হৈছে। 

 

যদি সোধা হয় অসমীয়া সাহিত্যৰ দহখন কালজয়ী উপন্যাসৰ নাম সেই তালিকাত নিশ্চিতভাৱে মহাৰথীয়ে স্থান গ্ৰহণ কৰিব। উল্লেখযোগ্য যে ১৯৯৫ চনত এই গ্ৰন্থখনে সাহিত্য একাডেমী বঁটা লাভ কৰিবলৈও সক্ষম হৈছিল।